Skal bygge ut Kalvåg fiskerihamn
Fylkestinget i Vestland har vedtatt å bygge ut fiskerihamna i Kalvåg.
Vestland fylkeskommune skal finansiere prosjektet som har ei ramme på 72 millionar.
I samband med regionreforma tok Vestland fylkeskommune over ansvaret for 99 fiskerihamner. Overtakinga inneber at fylkeskommunen overtar Kystverket sin plass i den utarbeidde avtalen med Bremanger kommune om utbygging av fiskerihamna i Kalvåg. Planen er å gjennomføre prosjektet i tidsrommet 2025 til 2027.
Viktig for verdiskapinga
- Den nye fiskerihamna i Kalvåg vil gi eit godt grunnlag for eit fornybart og berekraftig næringsliv knytt til ressursane i havet. Utbygginga er viktig for framtidig verdiskaping og busetting i den nordlege delen av fylket, og vil gi gode ringverknadar til heile Vestland, seier fylkesordførar Jon Askeland.
Ansvaret Vestland fylkeskommune har tatt på seg tilsvarar det Kystverket hadde, med unntak av det som gjeld navigasjonsinstallasjonar. Det er framleis Kystverket sitt ansvar.
Ny molo
Arbeidet som skal gjerast inneber å bygge ut ein molo og å djupe ut hamna. Kystverket har tidlegare gjort omfattande undersøkingar og utgreiingar knytt til dette arbeidet, mellom anna bølgeanalysar, grunnundersøkingar og økonomiske analysar. Fylkeskommunen vurderer forarbeidet som grundig og tilstrekkeleg og legg dette til grunn i sin avtale med Bremanger kommune.
Tidlegare i år vedtok fylkestinget ei tilsvarande utbygging av fiskerihamna på Bømlo.
Før fylkeskommunen overtok ansvaret for fiskerihamnene låg både Kalvåg og Bømlo fiskerihamn låg inne i NTP (Nasjonal transportplan) for 2024-2029 som blei vedtatt av Stortinget.